Oleh Nurjannah Usman
Allahurabbi ya Rabbul Qade
Tuhan nyang ade nyang peugot donya
Ulon teumuleh neuk sambong ca-e
Haba teupike sibok lam media
Sibok di teungku kitab neupike
Sibok di toke bak meuniaga
Sibok di guree geupeutrang hate
Geuneurasi akhe sibok ngon donya
Di peumeurintah qanun neupike
Akhe thon sabe peuget acara
Rata jeup sagoe bak medsos sare
Workshop geupike meuhei peuserta
Na syit nyang peugot liteurature
Pelatihan pike website media
Na syit hai teungku nyang hana buet le
Jimeuhoi sare uleh pra kerja
Meumacam cara peujabat pike
Akhe thon sabe sibok beukeurja
Han jeuet mengeluh walau lam hate
Gata boh hate gaji tiep masa
Teuma pesan lon hai bungong pade
Di dalam ca-e rubrik Meunara
Mandum keugiatan nyang ka meuase
Beuna ta pike bek pura-pura
Para peuserta lam daftar sare
MOU pike beuna seujahtera
Beujeuet jipubuet dudoe ‘oh akhe
Meu ubah pike mita keurija
Meubek meuseunda kegiatan sare
Beuna soe pike keu nasib bangsa
Menyo ka rakyat carong seumike
Nanggroe hana le dum ureueng papa
Carong meudagang dengon jak u gle
Carong jipike kreatif jimita
Carong jiolah nyang jeuet keu toke
Carong bak hape reuseuki jimita
Tajak u Sigli beutrok u Tangse
Ie krueng jih ile jeureungeh warna
Haba ka abeh ulon meu ca-e
Meu’ah boh hate salah ngon beuna
Neuheun, 24 November 2022
