Assalamu’alaikum kawom sinaroe
Lon beuot jaroe tanda mulia
Lon tuleh panton keu wareh adoe
Allah lon pujoe nyang peujeut donya
Bak jameun jinoe meumacam bagoe
Hudep meucawoe didalam donya
Donya lam gasien ta kalon bagoe
Hudep teuh phang phoe rakyat jeulata
Adak na kerja di dalam nanggroe
Rakyat deuek-deuek troe hana beulanja
Nyang ka pegawai ladom cut Putroe
Hudep tan gehgoe meupat beulanja
Meunyo hana peng di dalam jaroe
Hudep lam rugoe watee keunira
Hana le laba bak watee uroe
Di dalam peutoe dana ka hana
Negara gasien rakyat meutaloe
Uang lam nanggroe hana get lanca
Nanggroe tan aman utang meutaloe
Triliun lagoe utang negara
Bek keuh jipike keu aneuk nanggroe
Utang hana soe jak bayeu sigra
Geutanyoe rakyat bek that ta pakoe
Pike keu pruet droe pane beulanja
Pike keu eungkot sabe tiep uroe
Pike keu toko beuna soe jaga
Pike keu gaji keurija meu uroe
Beuna ngon tabloe campli ngon sira
Urusan politek kana soe hiroe
Geutanyoe adoe pike keurija
Kadang na gaji bak treb-treb sigo
Keubah lam jaroe untuk beulanja
Hudep produktif wareh sinaroe
Keurija lam nanggroe ube kuasa
Nyan peunteng haleue riba bek puwoe
Haleue sinaroe di rumoh tangga
Menyo tajeb eh leupie lam igoe
Nyan bakong asoe mangat meurasa
Haba lon peusep meumada ‘ohnoe
Meu’ah lon sidroe wahe pembaca
Neuheun, 18 Januari 2023
