Oleh : Nurjannah Usman
Assalamualaikum saleum lon layang
Haba kenalan lewat udara
Panton lon tuleh ca-e lon karang
Keu penghasilan bak mita laba
Ie laot ijoe bagoe hamparan
Oh wate pasang eungkot ka hana
Haba ta ceukot dalam keunalan
Keu peulajaran dalam useuha
Contoh bak nabi keurja meudagang
Geutanyoe intan beuna useuha
Walau na rugoe bak kadang-kadang
Seumangat rakan tamita laba
Tameukat sayur kadang brok barang
Boh tomat hitam kadang syedara
Kapayah taboh han lagot barang
Ka tinggai utang hansep beulanja
Nyang meukat Ija bak uroe peukan
Han abeh barang ka hek geubaba
Adak na lagot baje sipasang
Kasep keu jajan aneuk sidumna
Nyan buka warong ie kupi itam
Kadang meujan-jan kureng so teuka
Nyan meukat kue hana bantahan
Kadang syit tinggai oh malam jula
Nyan meukat honda ngon moto kijang
Hana bantahan kureung peumirsa
Adak na geujak geueu plat hitam
Wate hitungan ka kureung laba
Ban-bandum tanyoe nyang na meudagang
Na perjuangan beurayek saba
Bek bagah beungeh tanyoe hai rakan
Ureueng Iseulam beurayek saba
Han lagot jinoe mandum dagangan
Bak kemudian meurumpok laba
Nyang penteng saba ngon perjuangan
Allah takdirkan udeb beu kaya
Doa bak Allah dan perjuangan
Geutanyoe rakan nyang na useuha
Kasep keu ‘ohno masalah dagang
Me’ah hai rakan bak akhe kata
Neuheun, 5 Januari 2023
