Oleh : Ummi Kamil
Alhamdullah ulon pujoe Po
Tuhan sidroe nyang peujeut donya
Dalam watee nyoe panton lon ujoe
Tuleh hai adoe keu bola donya
Sabe ta kalon rata jeut sagoe
Ureueng meutaloe dimalam buta
Lam warong kopi ureueng meusahoe
Nonton hai adoe piala donya
Teuma diulon asai bek rugoe
Lon tuleh bagoe ca-e peu nyata
Dak hana lon nonton malam ngon uroe
Rata jeut sagoe ureueng bicara
Piala donya kali nyoe adoe
Lagak han bagoe ta kalon nyata
Watee jibuka lomba Allah jipujoe
Azan meusahoe deungoe suara
Bak bola donya kalinyoe adoe
Syariah meutaloe ajaran agama
Geukheun teukeudi bahasa kamo
Dakwah lapangan ijoe wahe syedara
Peumeuen Islam carong han bagoe
Nama kameusoe jithee le donya
Nanggroe Senegal na atlit Sadio
Hana lom tuwoe Karim Benzena
Na lom pak Ansu nanggroe Spanyol Po
Han abeh bagoe Xherdan ternama
Na syit di Jerman Pak Antonio
Sardar Azmoun Iran ternama
Le lom nyang laen hayeu han bagoe
Peumeuen droe Iseulam nyang beuna
Lhee ploh dua kalinyoe nanggroe
Ajang hai adoe piala donya
Nyang golom nonton bak warkop meusahoe
Ka jeut peusiap droe wahe syedara
Nyang peunting seumayang meubek neutowoe
Adak pih watee neuwoe lewat poh dua
Syariat Iseulam nomor sa adoe
Adak lam sagoe wajeb keurija
Seumayang wajeb utang deungoen Po
Laen hai adoe jeut nomor dua
Jimeusue azam ‘oh watee luhoe
Tinggai hai adoe mandum keureuja
Lon lake meu’ah haba ka sampoe
Kadang na tuwo bak suson kata
Banda Aceh, 01 Desember 2022
